‘საპატრიარქოს დაცვის დაინფიცირებულ თანამშრომელს შენობის შიდა ნაწილთან შეხება არ ჰქონდა’ - დეკანოზი

საპატრიარქოს პრესსპიკერი ანდრია ჯაღმაიძე ამბობს, რომ დაცვის თანამშრომელს საპატრიარქოს შიდა პერიმეტრთან შეხება არ ჰქონდა.

„მას ფიზიკური შეხება არ ჰქონია არავისთან, ბოლო დროს დისტანციურ ტემპერატურის საზომს ხმარობდნენ“.

მისივე თქმით, იმ პირთან ერთად, ვისაც ვირუსი აღმოაჩნდა, ტესტირება ორი დღის წინ მის ორ თანამშრომელსაც ჩაუტარდა.

„ეს ადამიანი, გარდა იმისა, რომ აქ საპატრიარქოში მუშაობს, ასევე თავის სამსახურშია და ასრულებს თავის სამსახურეობრივ მოვალეობასაც. მასთან ერთად ტესტირება ჩაუტარდა სხვა ორ თანამშრომელსაც და მათზე მოვიდა უარყოფითი პასუხები, მარტო ეს ერთი ადამიანია ჯერ-ჯერობით დაინფიცირებული“, - აცხადებს დეკანოზი.

რაც შეეხება დაინფიცირებულ სასულიერო პირს, დეკანოზის თქმით, მან ბოლოს ხარების დღესასწაულზე, 7 აპრილს აღავლინა მსახურება.

„ბოლოს მამა გიორგიმ იმსახურა ხარების დღესასწაულზე ტაძარში, როგორც მან გადნაცხადა, ყველა იმ წესის დაცვით, რაც დისტანციასთან არის დაკავშირებული. მსახურების შემდეგ, საღამოს იგრძნო თავი შეუძლოდ, რის შემდეგაც მიმართა ექიმებს და ანალიზმა ამცნო რომ აქვს ვირუსი. მეორე დღეს მას ჰქონდა მსახურება, თუმცა ტაძარში არავინ იყო“, - აცხადებს საპატრიარქოს პრესსპიკერი ანდრია ჯაღმაიძე.

მისივე განმარტებით, დაინფიცირებულ მღვდელთან ერთად მყოფი სხვა სასულიერო პირი თვითიზოლაციაშია, ტაძარი კი რამდენიმე დღით დაიკეტა და იქ სადეზინფექციო სამუშაოები ტარდება: „ტაძრი არის დაკეტილი, სრული კარანტინია გამოცხადებული. ეს რამდენიმე დღე, რაც დეზინფექციას დასჭირდება დაკეტილი იქნება, შემდეგ ვინმე სხვა, მოძღვარი შეასრულებს მსახურებას და აღდგომის დღესასწაულზე იქ იქნება წირვა“.

დეკანოზის თქმით, ისინი რისკ–ჯგუფში შემავალ პირებს მოუწოდებენ, ტაძრებში არ მივიდნენ, თუკი ფიქრობენ, რომ სიფრთხილე უნდა გამოიჩინონ.

„მაქსიმალურად ვაფრთხილებთ რის ჯგუფს, რომ თავი შეიკავონ, კარგად გვესმის ეს რისკები. ვინც ფიქრობს, რომ სიფრთხილე უნდა გამოიჩინოს და არ მივიდეს ტაძარში, ჩვენ ვეუბნებით, რომ თქვენ ეკლესიის წევრი ხართ და სახლში მოვალთ და გაზიარებთ და გადაცდომაში ამას არ ჩავუთვლით. ვისაც უნდა მოსვლა, მათ არ ვეუბნებით არ მოხვიდეთო, მათ პასუხისმგებლობა უნდა იგრძნონ“, - აცხადებს პრესსპიკერი ანდრია ჯაღმაიძე.

[თაკო ფეიქრიშვილი, ახალციხე]