‘მთავრობა ბიზნესისთვის საკრედიტო საგარანტიო მექანიზმს შექმნის’ – მაია ცქიტიშვილი

საკოორდინაციო საბჭოს სხდომის შემდეგ ცქიტიშვილმა მთავრობის მიერ წარდგენილ ეკონომიკური მხარდაჭერის ორმილიარდიან პაკეტზე და ბიზნესის მხარდაჭერის მექანიზმებზე ისაუბრა.

„ერთ-ერთი ასეთი ინსტრუმენტი არის სესხების საგარანტიო მექანიზმის შექმნა. ეს არის პროდუქტი, რომელზეც ამჟამად ვმუშაობთ კომერციულ ბანკებთან და ეროვნულ ბანკთან, რათა შემუშავდეს ისეთი კონკრეტული პაკეტები, რომელიც სხვადასხვა სექტორის გამოწვევას პასუხობს. საგარანტიო მექანიზმი მთლიანაობაში არის ორიენტირებული დაახლოებით ასევე 2 მილიარდიანი საკრედიტო პორტფელის გადაზღვევისთვის, შესაბამისად, სხვადასხვა ინსტრუმენტით, სხვადასხვა დარგისთვის, სხვადასხვა სექტორისთვის იქნება შემუშავებული კონკრეტული პროგრამები, რომელიც ბიზნესს მისცემს საშუალებას, ახალი სესხების აღების შემთხვევაში, ისარგებლონ მთავრობის მხარდაჭერით, რათა ბანკებიც და ბიზნესიც იყვნენ გარანტირებული, რომ კომპანიები შეძლებენ საკუთარი სესხების მომსახურებას“, – აცხადებს მაია ცქიტიშვილი.

მისი თქმით მთავრობა მუშაობს იმაზე რომ კრიზისული სიტუაციის დაძლევის შემდეგ, ბიზნესმა შეუფერხებლად შეძლოს ფუნქციონირება.

„ერთ–ერთი შემადგენელი ნაწილი იმ ორი მილიარდის, არის მათ შორის საკრედიტო მექანიზმის უზრუნველყოფა და მხარდაჭერა სახელმწიფოს მხრიდან. კონკრეტულ რიცხვებზე საუბარი იქნება ნაადრევი, ვინაიდან თითოუეული დარგი, რომელსაც შევთავაზებთ მხარდაჭერას, ხასიათდება სხვადასხვა დინამიკით, მათ აქვთ სესხების სხავადასხვა მოცულობა შესაბამისად, მათი სასესხო პორტფელის სხვადასხვა ოდენობის მხარდაჭერა იქნება შესაძლებელი“, – განაცხადა მაია ცქიტიშვილმა.

საქართველოში ამ დროისთვის, კორონავირუსის 131 დადასტურებული შემთხვევაა, გამოჯანმრთელდა 26 პაციენტი.

ქვეყანაში 31 მარტიდან მოქმედებს საკარანტინო რეჟიმი და ე.წ კომენდანტის საათი. მოქალაქეებს 21:00 დან 06:00 –მდე ეკრძალებათ ნებისმიერი სახის გადაადგილება.

[რობი ზარიძე, ახალციხე]