‘შემოსვლიდან მეორე დღეს დაეწყო სიმპტომები’- გამყრელიძე ინფიცირებულზე

დაავადებათა კონტროლის ეროვნული ცენტრის დირექტორის, ამირან გამყრელიძის განცხადებით, კიდევ ერთ ადამიანს, რომელსაც ახალი კორონავირუსი დაუდგინდა, სიმპტომების გამოვლენა საქართველოში ჩამოსვლის მეორე დღეს დაეწყო. იგი ჩრდილოეთ იტალიაში იყო ხუთდღიან მოგზაურობაში და ის საქართველოში ოთხშაბათს დაბრუნდა.

„შემოსვლის შემდეგ იყო უსიმპტომო. ინტენსიურად მიმდინარეობს კონტაქტების ძიება. შემოსვლიდან მეორე დღეს დაეწყო სიმპტომები და მან თვითდინებით მიმართა ინფექციურ საავადმყოფოს. ჩამოვიდა იტალიის რეისით, რომელიც ქუთაისში განხორციელდა. გუშინვე ჩაუტარდა გამოკვლევა. გვიან ღამით გვქონდა დადასტურებული შემთხვევა, თუმცა თავი შევიკავე განცხადებისგან, რადგან მინდოდა დილით კიდევ გადამემოწმებინა რეაგენტებით და როდესაც დავრწმუნდით, რომ იყო დადებითი, ვაკეთებთ განცხადებას. მისი ჯანმრთელობის მდგომარეობა ამ ეტაპზე დამაკმაყოფილებელია“, - აცხადებს გამყრელიძე.

დაავადებათა კონტროლის ეროვნულ ცენტრში არ აკონკრეტებენ დაინფიცირებულის სქესს და ასაკს.

გამყრელიძემ აღნიშნა, რომ ევროპაში ახალი შემთხვევები ყოველდღიურად იზრდება და კორონავირუსი ამ დროისთვის 51 ქვეყანაშია გავრცელებული, რაც იმას ნიშნავს, რომ საზღვრებზე მკაცრი კონტროლი ნაკლებად იქნება შედეგიანი.

მისივე ინფორმაციით, ამ დროისთვის საქართველოში კარანტინში იმყოფება 87 ადამიანი, აქედან 31 საჩხერეში, 21 აბასთუმანში და ასევე, გამოიყო ბავშვთა განყოფილება ტუბცენტრში, რომელიც იზოლირებულია ძირითადი შენობისგან და იქ არის 35 ადამიანი.

ადამიანებს, რომლებიც საქართველოში შემოდიან იმ ქვეყნებიდან, რომლებშიც კორონავირუსის მაჩვენებელი მაღალია და განსაკუთრებით ჩრდილოეთ იტალიიდან, ამირან გამყრელიძე აძლევს რეკომენდაციას, თუ სიმპტომები არ აღენიშნებათ, 14 დღის განმავლობაში თვითიზოლაციაში იყვნენ. იმ შემთხვევაში, თუ ამ პერიოდში ექნებათ ტემპერატურა, ხველა, სუნთქვის გაძნელება, მიმართონ ექიმს.

[sknews.ge]