N1ადიგენის საარჩევნო უბანზე გადასატან ყუთს "ოცნების" და "ნაციონალების" წევრები გაყვებიან

კენჭისყრის დაწყებამდე უბანზე კანონმდებლობით გათვალისწინებული ყველა პროცედურა ჩატარდა. უბნის გახსნისთანავე თავმჯდომარემ გოდერძი კუბლაშვილმა კომისიის წევრებს მიმართა და სთხოვა, რომ კენჭისყრის პროცედურები ნორმალურად ჩაატარონ და ერთმანეთს ხელი არ შეუშალონ.

„გაიხსნა უბანი, ყველა წესის დაცვით. პირველმა ამომრჩეველმა 08:06 სთ-ზე გაიარა რეგისტრაცია, შეივსო საკონტროლო ფურცელი, მოთავსდა ყუთებში და დაიწყო კენჭისყრის პროცედურა“, - განაცხადა გოდერძი კუბლაშვილმა.

წილისყრით გამოვლინდა გადასატან ყუთის წამღები კომისიის 2 წევრიც, ერთ-ერთი მათგანი „ერთიანი ნაციონალური მოძრაობის“, მეორე კი კოალიცია „ქართული ოცნების“ წარმომადგენელია.

„რაც შეეხება საჩივრების დამკვირვებელს, ამ შემთხვევაში უნდა ყოფილიყო საარჩევნო სუბიექტების ორი წარმომადგენელი, მაგრამ სამწუხაროდ ჩვენთან აღმოჩნდა მხოლოდ ერთი სუბიექტის "დემოკრატიული მოძრაობა ერთიანი საქართველოსთვის" წარმომადგენელი, შესაბამისად საჩივრების მხოლოდ ერთი დამკვირვებელი გვყავს“, - განმარტავს გოდერძი კუბლაშვილი.

ადიგენის N1 საარჩევნო უბანზე პირველი ამომრჩეველი გულნარა მირიანაშვილი იყო, რომელიც დაბა ადიგენის მკვიდრია.

„ვფიქრობ, რომ არჩევნები მშვიდობიანად ჩაივლის, არ იქნება დარღვევები და ხალხის რჩეული გაიმარჯვებს“, - ამბობს გულნარა მირიანაშვილი.

ადიგენის N1 საარჩევნო უბანზე ერთიან სიაში ამომრჩეველთა რაოდენობაა - 826, სპეც სიაში - 7, გადასატან საარჩევნო ყუთის სიაში კი 13. რაც შეეხება მიღებული საარჩევნო ბიულეტენების რადონობას, 750-ია.

დამკვირვებლები მხოლოდ ორი საარჩევნო სუბიექტიდან არიან წარმოდგენილი. კოალიცია „ქართული ოცნებისა“ და „დემოკრატიული მოძრაობა ერთიანი საქართველოსთვის“.

უბანზე იმყოფებიან არასამთავრობო ორგანიზაციისა და მედიის წარმომადგენლებიც.

09:00 საათზე უბნიდან უკვე გავიდა გადასატანი ყუთი.

[sknews.ge]