გადასატანი ყუთის მოთხოვნის დრო იწურება

იმ ამომრჩევლებმა, რომელთაც კენჭისყრის დღეს საარჩევნო უბანზე მისვლა არ შეუძლიათ და ხმა გადასატანი ყუთის მეშვეობით უნდა მისცენ, საარჩევნო კოდექსის 33-ე მუხლის მე-2 პუნქტის თანახმად, შესაბამის უბანს, გადასატანი ყუთის მოთხოვნით, განცხადებით უნდა მიმართონ.

მიმართვის ვადა დღეს, 24 ოქტომბერს, იწურება. დღის ბოლომდე გადასატანი საარჩევნო ყუთის სიაში შესაყვანი ამომრჩევლების შესახებ ინფორმაცია დაუყოვნებლივ უნდა გამოიკრას საარჩევნო უბანში თვალსაჩინო ადგილზე (33-ე მუხლის მე-3 პუნქტი).

რამდენმა ამომრჩეველმა მოითხოვა გადასატანი ყუთი, ჯერ ამის შესახებ საოლქო კომისიებში მონაცემები არ შესულა.

„ამ ეტაპზე ჩვენ ვაკონტროლებთ იმას, რომ გადასატან ყუთზე მოთხოვნა არ გასცდეს 3 პროცენტს. დღის ბოლოს ზუსტად მეცოდინება რამდენი განცხადებაა შემოსული“,- ამბობს #38 ადიგენის საოლქო კომისიის თავმჯდომარე ჯაბა მაჭარაშვილი.

იგივეს გვეუბნებიან #37 ახალციხის საოლქო კომისიაშიც.

„ამ ეტაპზე საოლქო კომისიის წევრები ამოწმებენ მოთხოვნამ ხომ არ გადააჭარბა სამ პროცენტს. გადაჭარბების შემთხვევაში უბნის კომისია ადგილზე გადაამოწმებს იმ ადამიანებს, ვინც გადასატან ყუთს ითხოვს. თუ საუბნო კომისია დარწმუნდება, რომ ნამდვილად ესაჭიროება სამ პროცენტზე მეტს აღნიშნული მომსახურება, ამის შესახებ წერილობით საოლქო კომისიის წევრებს მიმართავს, რის შემდეგადაც ოლქი საბოლოო გადაწყვეტილებას მიიღებს“,- გვიხსნის თეა გავაშელი.

[მანანა სარაშვილი, ახალციხე]