'ქართულმა ოცნებამ' არალის მოსახლეობას კანდიდატი წარუდგინა

არლელებს, ზურაბ ფეიქრიშვილის კანდიდატურის შესახებ, ადგილობრივი თვითმმართველობის წარმომადგენლები და პარლამენტის ფრაქცია „ქართული ოცნების“ თავმჯდომარე მამუკა მდინარაძე ესაუბრნენ.

როგორც მათ მოსახლეობასთან განმარტეს, არჩევნებში პარტიის სახელით მონაწილეობას ზურაბ ფეიქრიშვილი მიიღებს.

„ზურაბ ფეიქრიშვილი არის ერთ-ერთი ღირსეული კაცი, ადამიანი, რომელიც თაობებს ზრდიდა. ჩვენ ვფიქრობთ, რომ ასეთი ღირსეული კანდიდატებით, ზოგადად, ბევრ გამარჯვებას მივაღწევთ“, - აღნიშნა წარდგენისას მამუკა მდინარაძემ.

ზურაბ ფეიქრიშვილი 37 წლისაა და არალში ცხოვრობს. იგი აქამდე არცერთ პოლიტიკურ პარტიას არ წარმოადგენდა. წლების განმავლობაში თავისუფალი ჭიდაობის მწვრთნელი იყო.

როგორც კანდიდატი ამბობს, მომავალი წლიდან, ადგილობრივი ბიუჯეტის დაგეგმარებისას, სოფლის ინტერესების გამტარებელი იქნება: „ამ სოფელში გავიზარდე, თითოეული ადამიანის გულისტკივილი ვიცი. ძალიან ბევრი ახალი კარგი პროექტი იგეგმება დ ამ პატიოსან გუნდთან ერთად, დარწმუნებული ვარ, ბევრ კარგ საქმეს გავაკეთებთ ჩვენი სოფლისთვის“, - განაცხადა ზურაბ ფეიქრიშვილმა.

ადიგენის მუნიციპალიტეტის სოფელ არალში შუალედური არჩევნები იმის გამო იმართება, რომ 2019 წლის ხუთ აპრილს, სოფლის მაჟორიტარი დეპუტატი ლაზარე ჩილინგარაშვილი, ავადმყოფობის შედეგად გარდაიცვალა. მას ადიგენის საკრებულოში საფინანსო–საბიუჯეტო, ეკონომიკისა და ქონების მართვის კომისიის თავმჯდომარის პოსტი ეკავა. ლაზარე ჩილინგარაშვილმა მაჟორიტარობის მანდატი 2017 წლის ადგილობრივი თვითმმართველობის არჩევნებზე მოიპოვა.

დაახლოებით ექვსი თვეა, არალს ადიგენის საკრებულოში დეპუტატი არ ჰყავს.

სოფელში სულ 1 467 ამომრჩეველია რეგისტრირებული.

[თაკო ფეიქრიშვილი, ადიგენი]