პოლიციელებზე ძალადობისთვის დაკავებულ სამ პირს გირაოთი გაათავისუფლებენ

სასამართლო პროცესი ახალქალაქში დღეს, 30 ივლისს გაიმართა.

მოსამართლემ არ დააკმაყოფილა პროკურორის შუამდგომლობა პატიმრობის შესახებ და ბრალდებულებს გირაოს გადახდა დააკისრა.

„შემთხვევა მოხდა კარწახის ტბაზე, სასაზღვრო ზოლში. პროკურორმა ვერ დაასაბუთა ბრალდება და მოსამართლემ ჩემი მოთხოვნა გაითვალისწინა. იმ დროს, როდესაც მესაზღვრეები ამტკიცებენ, რომ ბიჭებმა სცემეს, ჩემი დაცვის ქვეშ მყოფები სულ სხვა ადგილზე იმყოფებოდნენ. მე ამის დასამტკიცებლად ვიდეო მოვიპოვე. ახლა თანხას იხდიან ახლობლები და ერთ საათში სახლში იქნებიან ბიჭები“, – ამბობს ბრალდებულების ადვოკატი ირაკლი ბარძიმაძე.

შსს ინფორმაციით, მოსამართლის განჩინების საფუძველზე, საქართველოს სისხლის სამართლის კოდექსის 353 მუხლით, სოფელ კარწახის სამი მკვიდრი 28 ივლისს დააკავეს.

[sknews.ge]