„ეგზოტიკური ბუნება თუ სამკურნალო თვისებები“, – რა უფრო ხიბლავს დამსვენებელს აბასთუმანში ®

„90–იანებში თბილისში ვემზადებოდი ფრანგულ ენაში. ერთ–ერთ გაკვეთილზე ვახსენე აბასთუმნიდან ვარო და ჩემგან ორი მერხის შემდეგ მჯდარი გოგო უხერხულად შეიშმუშნა და თან მითხრა: საქართველო ამხელაა და მაინც და მაინც მანდ რატო ცხოვრობო“, – იხსენებს ერთ–ერთი აბასთუმნის მკვიდრი.

წლების წინ, მითი, რომ აბასთუმანში მხოლოდ ტუბერკულიოზით დაავადებული ადამიანები ცხოვრობდნენ და აქ დასვენების შემთხვევაში, ფილტვების დაავადება – ტუბერკულოზი გადაედებოდათ, საკმაოდ გავრცელებული იყო. დროთა განმავლობაში ეს მითი დავიწყებას მიეცა. ახლა ადამიანებმა იციან, რომ აბასთუმანი ქვეყნის ერთ–ერთი ყველაზე სასარგებლო სამთო–ბალნეოლოგიური კურორტია.

კურორტს, მხოლოდ სუფთა ჰაერისა და სამკურნალო თვისებების გამო არ სტუმრობენ. აღმოჩნდა, რომ დამსვენებლებს მისი ეგზოტიკური გარემო ძალიან მოსწონთ.

რატომ სტუმრობენ და ყველაზე მეტად რა მოსწონთ ვიზიტორებს აბასთუმანში, ამაზე, რესტორანი „საკალმახე აბასთუმანის“ მენეჯერი თორნიკე ქომოშვილი გვესაუბრება. მისი რესტორანი ობსერვატორიის გადასახვევიდან 2 კილომეტრში მდებარეობს.

რესტორანი „საკალმახე აბასთუმანი“, რომელიც კურორტზე ოთხი წლის წინ გაიხსნა, დამსვენებლებს საუკეთესო სარესტორნო მომსახურებას სთავაზობს.

როგორც თორნიკე ამბობს, სტუმართა აღფრთოვანებას იწვევს ხელუხლებელი და ბუნებრივი გარემო. ოთხივე მხრიდან შემოსაზღვრული ტყე, ტბა და სიმწვანე, დამსვენებელს საშუალებას აძლევს განიტვირთოს ყოველდღიური რუტინისგან.

„გადატვირთული განრიგის გამო, ადამიანები სულ უფრო ნაკლებ დროს ატარებენ ოჯახის წევრებისა და მეგობრების გარემოცვაში. ჩვენ კი ვცდილობთ ოჯახური და მყუდრო გარემო შევუქმნათ მოსულ სტუმრებს. ადამიანებმა კომფორტულად იგრძნონ თავი როგორც ოჯახის, ისე მეგობრების გარემოცვაში“, – ამბობს თორნიკე.

რესტორანი „საკალმახე აბასთუმანი“ სტუმრებს პირველი მაისიდან იღებს. ამ ეტაპზე შვიდი თანამშრომლით ახერხებენ მათ გამასპინძლებას, მაგრამ ზაფხულის პერიოდში ორმაგდება როგორც სტუმრების, ისე რესტორნის პერსონალის რიცხვი.

„საკალმახე აბასთუმანში“ტურისტული სეზონი ნოემბრის ბოლოს მთავრდება. ამ დროს ტურისტული სეზონი მთავრდება აბასთუმანშიც, თუმცა კურორტის „კარი“ ყოველთვის ღიაა, როგორც უცხოელი, ისე ადგილობრივი ტურისტებისთვის.