პრორუსული ორგანიზაცია 9 მაისს ჯავახეთში მსვლელობას აანონსებს

9 მაისის მსვლელობის შესახებ წერილი „საქართველოს სლავ ხალხთა ეროვნული კონგრესის“ პრეზიდენტის ლიკა ზახაროვას სახელით ახალქალაქის მერიაში პირველ აპრილს შევიდა.

„9 მაისს გამგეობიდან თავისუფლების ქუჩით ვაჩაგან ვანცინიანის ძეგლამდე ნათესავების სურათებით და პატარა დროშების თანხლებით ვაპირებთ მსვლელობასო, როგორც ჩანს უბრალოდ ინფორმაციას გვწავდიან, რადგან ქუჩის გადაკეტვა არ სჭირდებათ. წერილში ეწერა, რომ თავისუფლების ქარტიის შესაბამისად არანაირ აკრძალულ სიმბოლიკას არ გამოიყენებენ“, – ამბობს ახალქალაქის მერი იური უნანიანი.
მსგავსი შინაარსის წერილი დღეს, ექვს მაისს შევიდა ნინოწმინდის მერიაშიც.

„წერილს ჯერ საფუძვლიანად არც გავცნობივარ“, – გვითხრა ნინოწმინდის მერმა ანივარდ მოსოიანმა.

იურისტები ამბობენ, რომ თუ მსვლელობისას ტოტალიტარული რეჟიმებისთვის დამახასიათებელ სიმბოლიკას არ გამოიყენებენ, მათი მსვლელობა არ უნდა შეიზღუდოს.

„საქართველოს სლავ ხალხთა ეროვნული კონგრესი“ მსვლელობას საქართველოს კიდევ სამ ქალაქში აანონსებს. ღონისძიების ერთ–ერთი ორგანიზატორი „ევრაზიული ინსტიტუტის“ დამფუძნებელი, გულბაათ რცხილაძეა, რომელიც პრორუსული რიტორიკით გამოირჩევა, ეწინააღმდეგება საქართველოს ევროინტეგრაციას და სანაცვლოდ ქვეყნის “ევრაზიულ კავშირში” გაწევრიანებას ემხრობა. როგორც ის ფეისბუქ პოსტში წერს, მსვლელობა "საქართველოს უკვდავი ჯარის" ფორმატით მოხდება, რომელიც რუსული "უკვდავი პოლკის" ანალოგია.

მსვლელობის მაუწყებელი ფოტოები, პრორუსული მოძრაობის „საქართველოს უკვდავთა პოლკის“ ფეისბუქ გვერდზე, ოთხ მაისს გამოჩნდა. მოძრაობა ამავე სახელწოდების რუსული ორგანიზაციის ანალოგია, რომელიც ყოველი წლის 9 მაისს მოსკოვში მსვლელობას მართავს, საქართველოში კი 2017 წლის 9 მაისს გამოჩნდა. წელს „საქართველოს უკვდავთა ჯარი“ მსვლელობას ქვეყნის ხუთ ქალაქში, მათ შორის ახალქალაქსა და ნინოწმინდაშიც გეგმავს.

[ავთო ინასარიძე, ახალქალაქი]