ადიგენში არსებულ ეკო–დერეფანს ადგილობრივები დაიცავენ

ადიგენში, მესხეთის ფერდობების სამხრთ ნაწილში მდებარე დერეფანი კავკასიის მასშტაბით გამორჩეული მნიშვნელობის მქონე ტერიტორიაა. ეკო-კორიდორების ფონდის ეროვნული კოორდინატორი თათა ჭოჭუა ამბობს, რომ აქ არის მაღალი მნიშვნელობის ბუნებრივი ეკო-კორიდორი, სადაც არჩვის, ირმის, მურა დათვისა და სხვა საკვანძო სახეობების მიგრირება ხდება: „ადიგენის მუნიციპალიტეტი ბორჯომ-ხარაგაულის ეროვნულ პარკს აჭარის რეგიონთან და თურქეთის სახელმწიფოსთან აკავშირებს, ექსპრეტებთან ერთად შევისწავლეთ ტერიტორია და დავადგინეთ გარკვეული უბნები, რომლებსაც ე.წ. მშვიდ ზონებს ვუწოდებთ, ამ არეალზე აკრძალულია ნადირობა, თიბვა და სხვა ნებისმიერი აქტივობა, სწორედ ამ მიზნით სათემო კავშირები შეიქმნა და მასში შემავალი ე.წ. ბუნების ქომაგები აღნიშნულ ტერიტორიას დაიცავენ“.

ეკო-კორიდორების მოვლისთვის ათწლიანი საკონსერვაციო შეთანხმება ადიგენის ათი სოფლის სათემო კავშირთან გაფორმდა. დერცელის, მოხის, ნამინაურისა და ციხისუბნის სათემო კავშირებისთვის ათი წლის მანძილზე 751 000 ევროა გათვალისწინებული. ბოლაჯურის, ჩორჩნის, ზანავის, ხევაშენის, ფხეროს და კიკიბოს სათემო კავშირებისთვის კი 400 000 ევრო.

„გერმანელი გაწვდის იმის ფულს, რომ შენს ქვეყანას და ჰაერს მოუარეო, დადგა ამის დრო და ჩვენც უნდა გავაკეთოთ. მთაში, სადაც ზაფხულობით მივდივართ ხოლმე, ნადირის კორიდორებია და მოვლა სჭირდება. ამ ადგილებში ჩვენ პირუტყვის ძოვებას ავკრძალავთ, რადგან ცხოველებს პრობლემა არ შეექმნათ“, – ამბობს დერცელის სათემო კავშირის თავმჯდომარე ჯემალ შავაძე.

პროექტის ფარგლებში, თითოეულმა სოფელმა საკუთარი სურვილით გარკვეული ტექნიკაც იყიდა. ტყეში გადაადგილების მიზნით ბუნების ქომაგებმა “SUZUKI Jimny”-ს მარკის ავტომობილები, ასევე ტრაქტორები სპეციალური აგრეგატებით შეიძინეს.

ნამინაურის სათემო კავშირის თავმჯდომარეს, ბადრი ვაშაყმაძეს ვკითხეთ, თუ რას მოიქმედებენ თემის წევრები იმ შემთხვევაში, თუ ეკო-დერეფანში მონადირეებს გადააწყდებიან: „ჯარიმის დაწერის უფლება არ გვაქვს, ამიტომ სიტყვიერად გავაფრთხილებთ და ავუხსნით, თუ რატომ არ შეიძლება აქ ნადირობა. ამის შემდეგ ვაცნობებთ რეინჯერებსაც“.

საკონსერვაციო შეთანხმება საქართველოში ბუნების დაცვის მსოფლიო ფონდის (WWF) კავკასიის ოფისის მიერ, ასევე გერმანიის ეკონომიკური თანამშრომლობისა და განვითარების სამინისტროსა (BMZ) და გერმანიის რეკონსტრუქციის საკრედიტო ბანკის (KfW) ფინანსური მხარდაჭერით და გერმანიის WWF-ის თანადაფინანსებით ხორციელდება.

[ავთო ინასარიძე, ახალციხე]