14 წლის ახალციხელი გიორგი შეგროვებული ფულით სარალიძის მოსანახულებლად წავიდა

„ერთი კვირის წინ ვნახე პოსტი ფეისბუქზე, დავეხმაროთ შვილმკვდარ მამებსო და დედას ვთხოვე წავალ და ჩავუტან რაღაცეებს–მეთქი, ცოტა მერე დამთანხმდა, ავიღე ჩემი შეგროვებული ფული და თბილისში წავედი“,– გვიყვება 14 წლის გიორგი გვირტიშვილი.

შეკითხვაზე, რატომ გადაწყვიტა თბილისში სარალიძისა და მაჩალიკაშვილის მოსანახულებლად წასვლა, გვპასუხობს: „ცუდია, რომ ჩემი ტოლი ბიჭები იღუპებიან. ამიტომ წავედი“.

გიორგი თბილისში მარტო წავიდა, იქ ჩასულს ახლობელი დახვდა და პარლამენტთან მან მიიყვანა. ამბობს, რომ ზაზა სარალიძესთან მისი შეხვედრა ემოციური იყო: „თავიდან რომ ჩავედი ზაზა სახლში იყო, მერე მოვიდა. მანამდე იქ სხვები გავიცანი. ზაზა რომ მოვიდა მკითხვა ვინ ვიყავი და რატო ჩამოვედი. მერე წავედით მაღაზიაში, და პროდუქტები ვიყიდეთ, ერთად მივირთვით ყველამ. მკითხა რა გინდა რო გამოხვიდეო. მეც ვუთხარი ჯარისკაცი–თქო და მომიწონა ნათქვამი“.

ჯარისკაცის პროფესიაზე გიორგი დიდი ხანია ოცნებობს: „ჯარისკაცები გაჭირვებულებს ეხმარებიან და სამშობლოს იცავენ, ამიტომ აუცილბელად წავალ ჯარში“.

გიორგი ახალციხეში ბებიასთან და დასთან ერთად ცხოვრობს, დედა იტალიაშია წასული სამუშაოდ. გიორგი პირველ სკოლაში, მეცხრე კლასში სწავლობს. ყველაზე მეტად მათემატიკა უყვარს. მისი ჰობი კი ფეხბურთის თამაშია.

„ყველაზე მეტად მომწონს როცა გაჭირვებულ ადამიანებს ვეხმარები. ამ ბოლოს ერთ–ერთ ასეთ ოჯახს დავეხმარე თბილისში. სახლში საწოლებიც კი არ ჰქონდა და ფული გადავურიცხე. დედა, რომ მიგზავნის–ხოლმე ვაგროვებ და მერე ვცდილობ სხვებს დავეხმარო“, – ამბობს გიორგი.

[მარიამ ბარძიმაძე, ახალციხე]