'სამოქალაქო მოძრაობა - ძალა ერთობაშია' პოლიტიკურ კოალიციად ყალიბდება

ამის შესახებ მოძრაობის ერთ-ერთმა წევრმა ნიკოლო მაჭუტაძემ საგანგებო ბრიფინგზე განაცხადა. მისი თქმით, გაერთიანება გაერთიანებული ოპოზიციის გეგმის ნაწილია და მათი მიზანი ივანიშვილის რეჟიმის შეცვლაა.

„ჩვენი მოძრაობის უმთავრესი მიზანია, საყოველთაო კონსენსუსის საფუძველზე შემუშავებული ძირეული ცვლილებების განხორციელება ქართული სახელმწიფოს მოწყობის, სამართლიანი და კონკურენტული პოლიტიკური გარემოს ჩამოყალიბებისა და ქვეყნის დინამიური განვითარების ფუნდამენტის უზრუნველსაყოფად. ზემოაღნიშნულის მისაღწევად გადაუდებელ აუცილებლობას წარმოადგენს საზოგადოებისა და პოლიტიკური ოპოზიციის კონსოლიდაცია: არსებული ხელისუფლების შესაცვლელად პარლამენტის უახლოეს არჩევნებზე; ეროვნული თანხმობის მთავრობის ფორმირებისათვის; ფართო კონსენსუსით ჩამოყალიბებული დეკლარირებული საკანონმდებლო (კონსტიტუცია, საარჩევნო კანონმდებლობა) და ერთობლივი პროგრამული ცვლილებების განსახორციელებლად", – ნათქვამია სამოქალაქო მოძრაობის განცხადებაში.

უახლოესი საპარლამენტო არჩევნები საქართველოში 2020 წელს გაიმართება.

[sknews.ge]