კიკიბოს სკოლის ერთადერთ მოსწავლეს ველოსიპედი აჩუქეს [Photo/Video]

მულტიმედია მასალაში „სკოლა ვაგონში, სადაც ერთი მოსწავლეა“, რამინი ამბობს, რომ მას ყველაზე მეტად უნდა ველოსიპედი, ან მოტოციკლი ჰყავდეს.

„სტატია ვნახე ინტერნეტში, ქართული ენა არ ვიცი, მაგრამ არავის ახსნა სჭირდებოდა პატარა ბიჭის თვალებს. გავიგე, რომ ის ველოსიპედზე ოცნებობდა და ძალიან ბედნიერი ვიყავი, რომ ამ ოცნების ასრულება შემეძლო“, – ამბობს ალონ მოლაჰაიმიანი.

იგი ისრაელის მოქალაქეა, თბილისში ორი წლის წინ ჩამოვიდა და ახლა ერთ–ერთი საერთაშორისო კომპანიის ქართული წარმომადგენლობის ფინანსური და ეკონომიკური დეპარტამენტის ხელმძღვანელია.

ალონმა რამინისთვის ველოსიპედი იყიდა და ადიგენის სოფელ კიკიბოში მესამე კლასელ ბიჭს თავად მიუყვანა.

რამინს მისი მართვა არ გასჭირვებია. ამბობს, რომ ველოსიპედს ზოგჯერ ბიძაშვილებისგან, ხანდახან კი მეზობელი ბავშებისგან თხოულობდა და ტარება ამ დროს ისწავლა.



ზაფხულის არდადეგებზე რამინი მთაში, სოფლიდან რამდენიმე კილომეტრის მოშორებით იმყოფებოდა. სპეციალურად საჩუქრის სანახავად იგი სოფელ კიკიბომდე დედამ ცხენით ჩამოიყვანა: „მთაში ვიყავით და ცხენით ჩამოვედით დღეს. სულ გვთხოვდა ველოსიპედის ყიდვას. ახლა სურვილი აუსრულდა. ცოტაც წამოიზარდა და ჭკვიანად ივლის“, – ამბობს რამინის დედა დალი ხარაბაძე.

ველოსიპედთან ერთად, რამინმა ტკბილეული, ჩიფსები, საკანცელარიო ნივთები, ტანსაცმელი და ფეხსაცმელი მიიღო. ნივთების შეგროვებაში ვებ–გვერდის mastsavlebeli.ge რედაქციამ იზრუნა.

რამინთან ერთად, საჩუქრები კიკიბოს სკოლის პედაგოგმა ნანა მაცაბერიძემაც მიიღო. მასწავლებლის სახლმა მას საჩუქრად წიგნები გამოუგზავნა.











[თაკო ფეიქრიშვილი, ნანა ინასარიძე, ადიგენი]