სამცხე–ჯავახეთში სახელმწიფო ენის პრობლემებზე იმსჯელეს

დღეს, 26 აპრილს სახელმწიფო ენის დეპარტამენტის თავმჯდომარემ გიორგი ალიბეგაშვილმა სამცხე–ჯავახეთის მუნიციპალიტეტებში შეხვედრები გამართა.

მისი რეგიონში ჩამოსვლის მიზანი, დეპარტამენტის სტრატეგიისა და სამომავლო გეგმების გაცნობა იყო.

შეხვედრებისას, აქცენტები გაკეთდა აბრებსა და სარეკლამო ბანერებზე, ასევე ქართულენოვანი წარწერების მოწესრიგებასთან დაკავშირებით ერთობლივად გასატარებელ სამუშაოებზე.

დეპარტამენტის წარმომადგენლებს პირველი შეხვედრა ახალციხეში, სამხარეო ადმინისტრაციასთან ჰქონდათ, რის შემდეგაც, ისინი სამცხე–ჯავახეთის სახელმწიფო უნივერსიტეტს ესტუმრნენ და უმაღლეს საგანმანათლებლო დაწესებულებასთან ურთიერთთანამშრომლობის მემორანდუმი გააფორმეს.



უნივერსიტეტის რექტორმა, მაკა ბერიძემ სახელმწიფო ენის დეპარტამენტის წარმომადგენლებს, საგანმანათლებლო დაწესებულების სამომავლო გეგმები გააცნო და განაცხადა, რომ შემდეგში, ნებისმიერი აქტივობა, რაც ქართულ ენასთან იქნება დაკავშირებული, სახელმწიფო ენის დეპარტამენტთან ერთად დაიგეგმება.

"ჩვენ ვფიქრობთ არაერთი აქტივობის განხორციელებას სტუდენტებთან ერთად, ჩატარდება კონფერენციები და სამეცნიერო კვლევები, ამიტომ სახელმწიფო ენის დეპარტამენტის ჩართულობა და მათთან ერთად დაგეგმვა, ძალიან მნიშვნელოვანია", – განაცხადა შეხვედრაზე უნივერსიტეტის რექტორმა მაკა ბერიძემ.

სახელმწიფო ენის დეპარტამენტის ხელმძღვანელის გიორგი ალიბეგაშვილის თქმით, ქართულ ენასთან მიმართებაში არსებობს პრობლემები, მათ შორის კანონმდებლობის მხრივ, რაც მოსაგვარებელია –"ამიტომ ასეთი თანამშრომლობები, დაგვეხმარება ყველა პრობლემის მოძიებაში და ყველა ერთად მთავრობას მივაწვდენთ ხმას და ვეტყვით ჩვენი პრობლემების შესახებ".

დღესვე, გიორგი ალიბეგაშვილმა სამცხე–ჯავახეთის სახელმწიფო უნივერსიტეტის ახალქალაქის ფილიალიც მოინახულა და ჯავახეთში, ადგილობრივი თვითმმართველობის ხელმძღვანელებს შეხვდა.



[ლუბა გიორგაძე, ახალციხე]