ახალციხის საკრებულოს ყოფილმა თანამშრომლებმა სასამართლოში უჩივლეს

თვითმმართველი თემის ახალციხის მუნიციპალიტეტის საკრებულოში, კადრების და წერილების საკითხებში, ყოფილი უფროსი სპეციალისტი ეკა ტატალაშვილი და ქალაქის საკრებულოში საორგანიზაციო საკითხების ყოფილი სპეციალისტი თეა ბაღდოშვილი სასამრთლოს გზით სამსახურში აღდგენას ითხოვენ.

ყოფილი თანამშრომლები ადმინისტრაციული სარჩელის მიხედვით იძულებით განაცდურის ანაზღაურებას, ასევე მათ მიმართ მობილობის პროცედურების განხორციელებას და ინდივიდუალურ სამართლებრივი აქტების გამოცემას ითხოვენ, რომლის მიხედვითაც ორივე მათგანი იმ პოზიციაზე აღდგება, სადაც სამსახურიდან გათავისუფლებამდე მუშაობდა.

ტატალაშვილმა და ბაღდოშვილმა ახალციხის რაიონულ სასამართლოში სარჩელი 29 დეკემბერს შეიტანეს.

შეგახსენებთ, რომ ორივე მათგანი სამსახურიდან პირველ დეკემბერს გაათავისუფლეს. მათი გათავისუფლების შესახებ ბრძანებებში წერია, რომ მობილობის შეუძლებლობიდან გამომდინარე სამსახურიდან ათავისუფლებენ და მოხელეთა რეზერვში რიცხავენ. მოგვიანებით, 23 დეკემბერს კი ელექტრონულ ფოსტაზე მერიის ახალი ბრძანება მიიღეს, რომლის მიხედვითაც, გათავისუფლების შესახებ პირველ დეკემბერს გამოცემული ბრძანებები ბათილად იქნა ცნობილი.

„გვეუბნებიან, რომ მობილობის ეტაპზე ვართ ისევ, არადა მობილობა დასრულებულია, ამიტომ გაუგებარია რას გულისხმობენ“, – ამბობს თეა ბაღდოშვილი.

ტატალაშვილიც და ბაღდოშვილიც აცხადებენ, რომ ისინი პოლიტიკური ნიშნით გაათავისუფლეს– ტატალაშვილი „ევროპული საქართველოს“ წევრი, ბაღდოშვილი კი ამავე პარტიის წევრის მეუღლეა.

[თამუნა უჩიძე, ახალციხე]