სან დიეგოს სახელმწიფო უნივერსიტეტი აბიტურიენტებისთვის ახალციხეში სპეციალურ სემინარს გამართავს

სემინარის მიზანია სტუდენტებისათვის STEM დარგების გაცნობა და მათი უნივერსიტეტში წარმატებული სწავლისათვის მომზადება.

სემინარზე იქნება პრეზენტაციები, გაიმართება დისკუსიები და პრაქტიკული სავარჯიშოები მეცნიერების, ინჟინერიის, ბიოტექნოლოგიის, ფიზიკის, მათემატიკის და STEM მეწარმეობის, ასევე, ამერიკული უმაღლესი განათლების სისტემის შესახებ.

მონაწილეები ჩაერთვებიან გუნდურ პროექტებში, ექნებათ შესაძლებლობა სან დიეგოს სახელმწიფო უნივერსიტეტის ლექტორებთან, ადმინისტრაციის წარმომადგენლებთან და წარმატებულ სტუდენტებთან შეხვედრისა და გაცნობის.

პროფესორები გაუზიარებენ მათ საკუთარი კარიერული წინსვლის გამოცდილებას და ისაუბრებენ 21-ე საუკუნეში STEM დარგების მნიშვნელობასა და დასაქმების პერსპექტივებზე.

სემინარის დროს ლექციებს წაიკითხავენ სან დიეგოს სახელმწიფო უნივერსიტეტის პროფესორები ინგლისურ ენაზე. მონაწილეები ჩაერთვებიან გუნდურ პროექტებში, გაიცნობენ სან დიეგოს სახელმწიფო უნივერსიტეტის სტუდენტებსა და პროფესორ-მასწავლებლებს. მონაწილეებს გადაეცემათ სპეციალური სერტიფიკატი.

სემინარი გაგრძელდება 11:30 დან 17 საათამდე. სემინარის მონაწილეებს გაუმასპინძლდებიან სადილით.
მის: : ახალციხე, მანველიშვილის ქ. 19, დემოკრატიული ჩართულობის ცენტრი.

ღონისძიებას ორგანიზებას უწევს სან დიეგოს სახელმწიფო უნივერსიტეტი საქართველო და საერთაშორისო განათლების ცენტრი.

****

სან დიეგოს სახელმწიფო უნივერსიტეტი (SDSU) ასწლიანი ისტორიის მქონე ამერიკული უნივერსიტეტია. ის ერთ-ერთი უდიდესი და ყველაზე მოთხოვნადი უმაღლესი სასწავლებელია კალიფორნიის შტატში - 35,000 სტუდენტით და 130 მილიონ დოლარიანი ბიუჯეტით კვლევითი საქმიანობისთვის. სან დიეგოს სახელმწიფო უნივერსიტეტი, აშშ-ის ათასწლეულის გამოწვევის კორპორაციის (MCC) მეორე კომპაქტის ფინანსური მხარდაჭერით, საქართველოში 2015 წლიდან სთავაზობს მაღალი ხარისხის, საერთაშორისო აკრედიტაციის მქონე (ABET, ACS, WASC) საბაკალავრო პროგრამებს საინჟინრო და ტექნოლოგიურ (STEM) დარგებში. კურსდამთავრებულები მიიღებენ ამერიკულ დიპლომს. აღნიშნული პროგრამები ხელს შეუწყობს საქართველოში სამშენებლო, საბუნებისმეტყველო და ტექნოლოგიური დარგების განვითარებასა და ქვეყანაში მაღალკვალიფიციური სამუშაო ძალის მომზადებას.

ამჟამად სან დიეგოს სახელმწიფო უნივერსიტეტში სამცხე-ჯავახეთის სკოლების 13 კურსდამთავრებული წარმატებით სწავლობს.

[sknews.ge]