ანგარიშსწორება დამარცხების გამო?!

ოზურგეთის პირველ და მესამე საბავშვო ბაღებში მიტანილი ხორციდან ექსპერტიზისთვის ნიმუში მას შემდეგ აიღეს, რაც საბავშვო ბაღის თანამშრომლებმა, ტენდერში გამარჯვებული ზურაბ მელიქიძე ბაღში უვარგისი ხორცის შეტანაში დაადანაშაულეს. ასპინძაში რეგისტრირებული ორგანიზაციის წარმომადგენელი ზურაბ მელიქიძე ოზურგეთში 37 ბაღს ამარაგებდა და ხორცი სააღმზრდელო დაწესებულებებში ასპინძის სასაკლაოდან შპს ”მესხეთი პროდაქტიდან” შეჰქონდა.

ექსპერტიზის დასკვნით ხორცი უვნებელი აღმოჩნდა. ტესტირების ლაბორატორიაში ხორცი სურსათის ეროვნული სააგენტოს გურიის რეგიონული სამმართველოს დაკვეთით შემოწმდა.

-”ჩვენს მიერ ა.წ. 2 აპრილის #9 ; 1 და 3 საბავშვო ბაღებიდან აღებული ხორცის ნიმუშები ფიზიკო-ქიმიური (ხორცის სიახლე) და მიკრო ბიოლოგიური მაჩვენებლებით შეესაბამება სანიტარულ წესებსა და ნორმებს”, - ნათქვამია წერილში (#29. 8 აპრილი.2013 წ), რომელიც გურიის რეგიონული სამმართველოდან ოზურგეთის მუნიციპალიტეტის სკოლამდელი სააღმზრდელო-საგანმანათლებლო ცენტრის დირექტორმა მაკა ჭყონიამ მიიღო.

ზურაბ მელიქიძემ ექსპერტიზის დასკვნამდე საბავშვო ბაღების თანამშრომლების ბრალდება ”სამხრეთის კარიბჭესთან” უპასუხოდ დატოვა, 27 მარტს ტელეკომპანია ”იმედის” რვასაათიან საინფრომაციო გამოშვებაში კი საკვებად უვარგისი ხორცის საბავშვო ბაღებში შეტანის ფაქტი კატეგორიულად უარყო.

მას შემდეგ, რაც ექსპერტიზის დასკვნით ხორცი უვნებელი აღმოჩნდა, მელიქიძემ ”სამხრეთის კარიბჭეს” განუმარტა, რომ ოზურგეთის მესამე საბავშვო ბაღიდან მის მიერ ჩატანილი ხორცი დასაფქვავად იმ ყასაბთან წაიღეს, რომელსაც მან ტენდერში მოუგო. ანგარიშსწორების მიზნით ბაღს ყასაბმა ჯანსაღი ხორცის ნაცვლად საკვებად უვარგისი გაატანა.

-”ბაღიდან ხორცის გატანა დაუშვებელია და იმას რაც მოხდა, ასე არ დავტოვებ”, - განაცხადა მელიქიძემ.

ხორცი ბაღიდან გასატარებლად რომ ნამდვილად გაიტანეს, მაკა ჭყონიაც ადასტურებს: ”ელექტრო კატლეტის მანქანა გაფუჭდა, ხელისაც ჰქონდათ მაგრამ დროში ვერ ესწრებოდა მისი გატარება და ამიტომ დასაფქვავად სხვაგან წაიღეს”.

ისევე როგორც მელიქიძე, ჭყონიაც აცხადებს, რომ ბაღიდან ხორცის გატანის უფლება არავის ჰქონდა. მიუხედავად აკრძალვისა, ჭყონიას განცხადებით, ამ დრომდე ოზურგეთში არავის პასუხისმგებლობის საკითხი არ დამდგარა. რაც შეეხება მელიქიძეს, მან გათავისუფლების შესახებ ბრძანება დაწერა და მის ჩასანაცვლებლად ტენდერი უკვე გამოცხადდა.

-”ეს ამბავი სკანდალად იქცა, იმხელა რეზონანსი მოჰყვა, რომ თავად გადაწყვიტა მექლიქიძემ ჩვენთვის პირადი განცხადებით მოემართა”, - გვითხრა ჭყონიამ.

[თამუნა უჩიძე, ახალციხე]