"სოხუმი" სოფელ ზემო ენთელში [Video/Photo]

ეს, უკვე ძველი, საღებავგადასული, უმინებო და ნაწილების საწყობს დამსგავსებული ავტობუსი ადიგენში, სოფელ ენთელში, ბორის შეყლაშვილის ეზოში დგას. ავტობუსის უმოქმედობას მინაზე შერჩენილი "ტრაფარეტი" ნიღბავს... ირკვევა, რომ ეს შემთხვევითი როდია.

ჯერ მამას, მერე კი შვილს, ბორის შეყლაშვილს, ადგილობრივები აფხაზეთიდან, წლების განმავლობაში დააჰყავდათ, – ხან სავაჭროდ, ხან ექსკურსიაზე, ხან კი დასასვენებლად.

ბორისს ახსოვს, როგორ ხვდებოდნენ იქ ბოლო ჩასვლების დროს, ახსოვს ისიც, როდის შეწყდა მიმოსვლა, მაგრამ, ავტობუსის გაყიდვა არასოდეს უფიქრია, – მოგონებებისა და სიმბოლოების 'სკივრია' მისთვის და ამიტომ: „34 წლის არის, ბევრჯერ შემომთავაზეს გაყიდვა, თავის დროზე იმ ფულით თბილისში სახლის ყიდვაც შემეძლო, მაგრამ ვერ გავიმეტე“.

სოხუმზე მოგონებებით ამ სოფელში, ამ ავტობუსის წყალობით, მხოლოდ ბორისის ოჯახი არ ცხოვრობს. ადგილობრივებს ყველა მგზავრობა და ყველა დროის სოხუმი დეტალურად ახსოვთ.

დაკარგვის მიზეზებზე ყველას განსხვავებული აზრი აქვს, მაგრამ, ერთი, რაც ყველას აერთიანებს, იმედია – იმედი დაბრუნების, – სხვა დროს, სხვა საშუალებებით, სხვა ტრანსპორტით და სხვა მიზნით. იმედი აქვს ყველას, თარიღი კი არავის...





ბორის შეყლაშვილი ადიგენის მუნიციპალიტეტის სოფელ ზემო ენთელში მეუღლესთან და ვაჟთან ერთად ცხოვრობს და თავს სოფლის მეურნეობით ირჩენს.
ზემო ენთელი სამხრეთ საქართველოში, სამცხე-ჯავახეთის მხარის ადიგენის მუნიციპალიტეტში, ფერსათის მთის სამხრეთით, ზღვის დონიდან 1380 მეტრზე მდებარეობს;
სოფელი ფხეროს თემში შედის;
სოფელი დაბა ადიგენიდან დაშორებულია 13 კილომეტრით, ახალციხიდან (უახლოესი რკინიგზის სადგური) 24 კილომეტრით;
სოფელში არის შუა საუკუნეების ნაეკლესიარი.

[თინათინ ზაზაძე, ოთარ აწყურელი ადიგენი]