საჯარო რეესტრი: ბიზნესის რეგისტრაციის რაოდენობა გაიზარდა

საჯარო რეესტრის ეროვნული სააგენტოს ოფიციალური მონაცემებით, 2016 წელს, ნოემბრის ჩათვლით, ქვეყანაში რეგისტრირებული ბიზნეს სუბიექტების რაოდენობამ 43938 ერთეული შეადგინა, რომელთა შორის 42 205 სამეწარმეო სუბიექტი, 1 733 კი არასამეწარმეო სუბიექტია.
შესაბამისად, ბიზნეს სუბიექტების 96.1% სამეწარმეო სუბიექტს წარმოადგენს. (ინდივიდუალური მეწარმე, სოლიდარული პასუხისმგებლობის საზოგადოება, შეზღუდული პასუხისმგებლობის საზოგადოება, სააქციო საზოგადოება, კომანდიტური საზოგადოება, კოოპერატივი, უცხოური სამეწარმეო იურიდიული პირის ფილიალი). ხოლო 3.9% არასამეწარმეო სუბიექტს (არასამეწარმეოიურიდიული პირი, უცხოური არასამეწარმეო იურიდიული პირის ფილიალი, საჯარო სამართლის იურიდიული პირი).

2016 წელს ბიზნეს სუბიექტთა უმეტესობა დარეგისტრირდა ინდივიდუალური მეწარმისა და შეზღუდული პასუხისმგებლობის საზოგადოების სახით.

ამავე წელს, ქვეყანაში დარეგისტრირდა: 1 716 არასამეწარმეო იურიდიული პირი, 539 კოოპერატივი, 197 უცხოური სამეწარმეო იურიდიული პირის ფილიალი, 70 სააქციო საზოგადოება, 14 უცხოური არასამეწარმეო იურიდიული პირის ფილიალი, 3 საჯარო სამართლის იურიდიული პირი და 2 სოლიდარული პასუხისმგებლობის საზოგადოება.

რაც შეეხება უძრავ ქონებას, 2016 წელს, ნოემბრის ჩათვლით, უძრავი ქონების სარეგისტრაციო ტრანზაქციათა რაოდენობა წინა წელთან შედარებით 19.4%-ით გაიზარდა და ქვეყნის მასშტაბით 586 894 ერთეული შეადგინა.

წინა წელთან (ნოემბრის ჩათვლით) შედარებით, უძრავ ქონებაზე საკუთრების უფლების პირველადი სარეგისტრაციო ტრანზაქციების რაოდენობა 45.9%-ით, ხოლო მეორადი სარეგისტრაციო ტრანზაქციების რაოდენობა 13.3%-ით გაიზარდა.

რაც შეეხება პირველად და მეორად სარეგისტრაციო ტრანზაქციებს შორის თანაფარდობას, წინა წელთან შედარებით გაიზარდა პირველადი სარეგისტრაციო ტრანზაქციების წილი: 2016 წელს განხორციელებული სარეგისტრაციო ტრანზაქციების 77.0%-ს მეორადი, ხოლო 23.0%-ს - პირველადი სარეგისტრაციო ტრანზაქციები შეადგენს.

[sknews.ge]