მკვდარი ღორები ამ დრომდე მტკვარში ყრია

ახალციხის მუნიციპალიტეტის სამ სოფელში აგარაში, საყუნეთსა და ზიკილიაში ღორები მასიურად იხოცება. როგორც საყუნეთის მკვიდრი ლია ხუციშვილი ამბობს, მოსახლეობა მკვდარ ღორებს მდინარეში ყრის.

”სამხრეთის კარიბჭემ” მტკვარში ჩაგდებული სამი ღორი გადაიღო. მკვდარი ღორები ქვებშია გაჭედილი. ადგილობრივები ამბობენ, რომ ასე ხშირად ხდება.

რატომ იხოცება ღორები, სოფელში არ იციან, ამბობენ რომ ასე 4-5 წელიწადში ერთხელ მეორდება.

”დახოცილი გოჭები მიწაში დავმარხე”, - გვითხრა ნუგზარ ქუქჩიშვილმა, რომელსაც 9 გოჭი მოუკვდა.

რა დაავადებით იხოცება ცხოველები, ვერც ”ახალციხის სასოფლო საკონსულტაციო ცენტრში” გვპასუხობენ. აგრო-კონსულტანტი ზურა სადათიერაშვილი გვიხსნის, რომ შესაძლოა ეს შავი ჭირი იყოს: ”თუ ლაბორატორიაში არ მიიტანენ და შეამოწმებენ, ასე მხოლოდ ვარაუდის გამოთქმაა შესაძლებელი”.

სურსათის უვნებლობის, ვეტერინარიისა და მცენარეთა დაცვის ეროვნული სამსახურის ახალციხის რაიონული სამმართველოში ამბობენ, რომ მომხდარის შესახებ იციან.

”ჩვენი თანამშრომელი წავა სოფელში, გამოიტანს ღორებს მდინარიდან და დამარხავს”, - განაცხადა სურსათის უვნებლობის, ვეტერინარიისა და მცენარეთა დაცვის ეროვნული სამსახურის ახალციხის რაიონული
სამმართველოს უფროსმა ლია ბექაურმა.

შეგახსენებთ, მდინარე მტკვარსა და მის სანაპიროზე მკვდარი ღორები ადგილობრივებმა გუშინ საღამოს შეამჩნიეს.

[თამუნა უჩიძე, ახალციხე]