დამოუკიდებელი კანდიდატი ნუგზარ პარუნაშვილი ამომრჩევლებს შეხვდა

ადგილობრივები პარუნაშვილს საპენსიო ასაკის დაწევაზე, გაძვირებულ მედიკამენტებზე და უმუშევრობის პრობლემებზე ესაუბრნენ.
პარუნაშვილი მათ პრობლემების მოგვარებას დაჰპირდა.

„სოციალური პრობლემებია პირველ რიგში მოსაგვარებელი და ყველგან უმუშევრობაა. ზოგან წყალი არ არის, გაზი, ინტერნეტი, მე ვპირდები ჩემს ამომრჩევლებს, რომ აუცილებლად დავეხმარები“, – ამბობს პარუნაშვილი.

„ძალიან დიდი იმედი მაქვს, რომ მისი დაპირება გამართლდება. ნუგზარი არის ახალციხის მკვიდრი, ხალხი უყვარს, მან კარგად იცის ხალხს როგორ დაეხმაროს. თუ მოხვდება დააყენებს ჩვენს პრობლემებს პარლამენტში და იქნებ დაგვეხმარონ“, – ამბობს თამარაშვილის ქუჩაზე მცხოვრები ნანული კვირიკაშვილი.

საინიციატივო ჯგუფის მიერ წარდგენილი კანდიდატი ამბობს, რომ ამომრჩევლებს ყოველდღიურ რეჟიმში ხვდება. ადიგენის და ახალციხის მუნიციპალიტეტებში თითქმის ყველა სოფელი მოიარა, ამ ეტაპზე კი შეხვედრებს ახალციხეში მართავს.

პარუნაშვილი გამარჯვებაში დარწმუნებულია. იგი ირწმუნება, რომ ადგილობრივებთან კომუნიკაცია გამარჯვების შემდეგაც ექნება: „თავისუფალ დროს მოსახლეობას შევხვდები და მათ პრობლემებს დეპუტატის ტრიბუნიდან გავაჟღერებ“.



[თინათინ ზაზაძე, ახალციხე]