სომხეთის და აზერბაიჯანის წარმომადგენლები მოსალაპარაკებლად მოსკოვში შეიკრიბებიან

სომხეთის და აზერბაიჯანის წარმომადგენლების შეხვედრასთან დაკავშირებით, ინფორმაციას on.ge, გამოცემა FRANCE24-ზე დაყრდნობით ავრცელებს.

მედიის ცნობით, დაპირისპირებული მხარეები პუტინმა მიიწვია, რათა მთიან ყარაბაღში ცეცხლის შეწყვეტასთან დაკავშირებით მოსკოვისგან კონსულტაციები მიიღონ.

"ბაქომ და ერევანმა დაგვიდასტურა თავიანთი მონაწილეობა იმ კონსულტაციებში, რომელიც მოსკოვში გაიმართება", — განაცხადა რუსეთის საგარეო საქმეთა მინისტრის სპიკერმა, მარია ზახაროვამ.

მედიის ცნობით, ზახაროვამ ასევე აღნიშნა, რომ ამ საკონსულტაციო შეხვედრებისთვის მზადება უკვე დაწყებულია.

პირველ ოქტომბერს საქართველოს პრემიერ–მინისტრმა, გიორგი გახარიამ დაპირსპირებული მხარეები მოლაპარაკებებისთვის საქართველოში მოიწვია. პრემიერმა განაცხადა, რომ მთიან ყარაბღში ვითარების შემდგომი ესკალაცია ნეგატიურ გავლენას იქონიებს მთელი რეგიონის უსაფრთხოებაზე.

"ჩვენი საერთო ინტერესია, რაც შეიძლება სწრაფად დამყარდეს მშვიდობა რეგიონში. საქართველო მზად არის, ნებისმიერი ფორმით შეუწყოს ხელი ამ პროცესს, მათ შორის, დიალოგის გამართვის მიზნით, უმასპინძლოს კონფლიქტის მხარეების წარმომადგენელთა შეხვედრას თბილისში", — განაცხადა გახარიამ.

მთიან ყარაბაღში სამხედრო დაპირისპირება 27 სექტემბერს განახლდა. სომხეთი და აზერბაიჯანი პროვოცირებაში ისევ ერთმანეთს ადანაშაულებენ, თვითაღიარებული ყარაბაღი კი მომხდარზე პასუხისმგებლობას აზერბაიჯანის პრეზიდენტს ილჰამ ალიევს აკისრებს.

[sknews.ge]