სამოქალაქო ინიციატივებისთვის ხმის მიცემის პროცესი დაიწყო

გადარჩეული 83 ინიციატივისთვის, ხმის მიცემა მხოლოდ ახალციხის მუნიციპალიტეტში რეგისტრირებულ მოქალაქეებს შეუძლიათ.

საკუთარი პოზიციის დაფიქსირებამდე, მათ მოკლე კითხვარი უნდა შეავსონ, სადაც მითითებული იქნება პირადი ნომერი, იმის დასადასტურებლად, რომ მოქალაქე ნამდვილად ახალციხის მუნიციპალიტეტიდანაა. სხვა შემთხვევაში, დაფიქსირებული ხმა არ მიიღება.

ხმის მიცემის პროცესი პირველ ნოემბერს დასრულდება.

ახალციხის მერიის კულტურისა და განათლების განყოფილების ხელმძღვანელის, ლევან მიქაბერიძეს თქმით, ვებ–გვერდზე ის ინიციატივებიც გამოქვეყნდება, რომლებიც შემდეგ ეტაპზე ვერ გადავიდა: „ასეთი სულ 39 ინიციატივაა, ყველა გამოქვეყნდება შესაბამისი განმარტებით, თუ რატომ ვერ გადავიდა შემდეგ ეტაპზე“.

პროექტი „დაგეგმე შენი ბიუჯეტი“ ესტონური მოდელის ანალოგია. იგი ახალციხეში 2018 წლიდან დაინერგა. პროექტი ასოცირების ხელშეკრულების ფარგლებში USAID-ის, GGI–ისა და IDFI–ის მხარდაჭერით დაიწყო.

2019 წელს, ახალციხის მერიის გადაწყვეტილებით, პროექტის ბიუჯეტი გაიზარდა და 50 000 ლარის ნაცვლად, 250 000 ლარი გახდა, რომლის ფარგლებშიც, მოქალაქეების ხუთი ინიციატივა დაფინანსდება.

[ავთო ინასარიძე, ახალციხე]