თურქეთისა და აზერბაიჯანის ავიაციამ სტიქიის ზონა დატოვა

დღეს, 27 აგვისტოს, შსს–მ ბორჯომში, სტიქიის ზონაში არსებულ მდგომარებასთან დაკავშირებით განცხადება გაავრცელა, უწყების ინფორმაციით ბორჯომში,დაბის მიმდებარე ტერიტორიაზე, მთის ფერდობზე გაჩენილი ხანძარი ლიკვიდირებულია. ხანძრის ცალკეული, მცირე კერების რაოდენობამ მნიშვნელოვნად იკლო. ამის გამო, საგანგებო შტაბმა გადაწყვეტილება მიიღო ცოცხალი ძალისა და სახანძრო ტექნიკის შემცირების შესახებ.

"ამ ეტაპზე ხანძრის ცალკეული, მცირე კერების ლიკვიდაცია-დამუშავება კი უწყვეტ რეჟიმში მიმდინარეობს. საგანგებო შტაბი ბორჯომის ხეობაში მუშაობას აგრძელებს", – აცხადებენ უწყებაში.

ხანძრის ქრობის პროცესში, საჰაერო ხანძარსაწინააღმდეგო ტექნიკის ჩართვის დღიდან, ამ დრომდე, ავიაციამ 2100-ზე მეტი რეისი განახორციელა. ხანძრის კერებზე საჰაერო ტექნიკამ დაასხა 5200 ტონაზე მეტი წყალი.

სოფელ დაბის მიმდებარე ტერიტორიას ეტაპობრივად ტოვებენ თავდაცვის სამინისტროს საჯარისო შენაერთები. ადგილზე სამხედრო მოსამსახურეების მხოლოდ ერთი ასეული დარჩება.

ხეობაში მუშაობას აგრძელებენ შსს-ს დანაყოფები, სახანძრო-სამაშველო ბრიგადები და ეროვნული სატყეო სააგენტოს თანამშრომლები, შესაბამის სპეცტექნიკასთან ერთად. ისინი ნახანძრალ ტერიტორიას გააკონტროლებენ და პრევენციულ ღონისძიებებს განახორციელბენ.

[sknews.ge]